Human sa ika-tulo nga hugna nga pagbotar, may napili na nga bag-ong Santo Papa ang Vatican.
Pasado alas-onse sa gabie, oras dinhi sa Pilipinas, napili si Cardinal Robert Francis Prevost, 69 anyos, natawo niadtong Setyembre 14, 1955, sa Chicago, Illinois, Amerika.
Iyang napili ang ngalan nga Pope Leo XIV, agig sumusunod ni Pope Leo XIII, nga misilbing isip Santo Papa niadtong tuig 1878 – 1903.
Ilado si Pope Leo XIII sa iyang sikat nga encyclical ang Rerum Novarum.
Gipili ni Cardinal Prevost ang ngalang Leo XIV aron ipadayag ang iyang respeto sa tradisyon ug pagpadayon sa mga reporma nga gisugdan sa iyang mga gisundan.
Unod sa Rerum Novarum ang pagdepensa sa mga katungod sa mga trabahante ug pagpalanog sa social justice.
Nagsumikad silang duruha sa congregasyon nga Order of Saint Augustine (O.S.A.).
Ilado ang mga Agustinong Pari isip mga “intellectual”, “centrist” o tigpataliwala, duol sa kumunidad, paghatag importansya sa edukasyon, ug mga misyonaryo nga gapangalagad sa tibook kalibutan.
Ang bag-ong Santo Papa, si Papa Leon ika-14, na-ordinahan sa iyang pagkapari sa tuig 1977 isip usa ka misyonaryo, ug nagpabiling misyunaryo sa buhat ilabe didto sa Peru, diin siya nagserbisyo sa Chiclayo.
Siya ang ika 267th nga Santo Papa sa Simbahan Katolika, ug labing unang Santo Papa nga Amerikano.
Sa iyang unang mensahe sa Urbi et Orbi, gikan sa balkonahe sa St. Peter’s Basilica, iyang gilakmitan ang “Peace be with all you” o ang kalinaw, ma-anaa kaninyong tanan.
Highlight sa iyang Urbi et Orbi o pinasahi nga panalangin mao ang pag-ampo alang sa kalinaw sa mga nasod nga nag-atubang sa gubat ug kagubot; Pagpakabana sa mga kabus ug mga biktima sa kalamidad; Pagpalig-on sa pagtuo ug pagdasig sa mga Kristiyano nga magpabilin nga lig-on sa ilang espirituhanong panaw.
Sa tuig 2023, si Pope Francis mipili kaniya isip Prefect sa Dicastery for Bishops, usa sa labing gamhanan nga opisina sa Vatican nga nagdumala sa pagpili sa mga obispo sa tibuok kalibutan.
Sa panapos nga bahin sa iyang ampo, iyang gilitok ang “Ave Maria”
