CAGAYAN DE ORO CITY – Pakigkitaan ni Misamis Oriental 2nd District Cong. Bambi Emano si Sen Koko Pimentel didto sa senado.
Kini aron hangyo-on nga tabangan nga madangop sa Liga ng Brgy National ang gidangatan nga ilegal pagpapha kang Gusa Punong Brgy Marlo Tabac isip bise-presidente sa Association of Brgy Councils ning syudad.
Gihimo ni Emano ang pahayag nunot sa nabulgar ni Tabac nga tipik sa basehan nga gipalagpot kini sa katungdanan sa ABC kay giakusahan midawat sa uno milyon pesos nga salapi gikan kang re-elected 2nd District City Councilor Yvy Emano sa milabay’ng eleksyon.
Namahayag ang kongresista nga dakong salikwaot nga kung kinsa kadtong nangakusar batok sa ilang manghod, mismo diay kini ang mihatag sa sobra milyones pesos nga salapi ngadto kang Tabac kay ipahatag ngadto sa mga botante sa distrito dos sa miaging piliay.
Kini ang rason nga angay ma-imbestigaran ang nahitabo kang Tabac kinsa nagsilbing campaign manager sa alyansa ni City Mayor Klarex Uy ug 2nd District Cong. Rufus Rodriguez.
Dumduman nga nakurat ang kadaghanan sa kalit gipapha sa katungdanan si Tabac gamit ang isyu sa loss of trust and confidence diin 64 ka kapitanes ang nagpaluyo niini.
Apan sulti pa ni Tabac nga mas maayu nga miprangka na ang unta si Federation ABC President Kag. Alam Lim nga si Carmen Punong Brgy Kikang Uy nga anak ni Klarex ang gusto ipapuli sa ibakante nga katungdanan niini kaysa mogamit pa sa laing pangalan aron tabunan ang tinud-anay nga motibo.
Una nang namahayag si Lim nga kagustuhan sa 64 ka kapitanes ang pagpabakante kang Tabac sa katungdanan ug igo lang daw kini mihimo sa iyang tahas isip pangulo sa liga ning syudad sa miaging semana.
Hisayrang sila Bambi ug Koko ang mga anak sa kanhi alyado sa politika nga nagka-kontra sa dugay’ng panahon nga sila late City Mayor Vicente ‘Dongkoy’ Emano ug late former Senator Aquilino ‘Nene’ Pimentel Jr nga pulos dagkong pangalan sa mga politico ning syudad.
