Suportado sa Department of Health (DOH) ang sugyot nga ma-implementar ang 30 kilometer per hour speed limit sa mga syudad.
Gipamatud-an ni DOH Secretary Teodoro Herbosa nga kasagaran biktima sa kusog nga dagan sa mga sakyanan mao ang mga bata.
Siya miingon nga isip “trauma surgeon”, maguot ang iyang dughan kung bata o magtutungha ang mulanding sa hospital kay biktima sa hit and run.
Iyang gisuportahan ang sugyot kay alang kanila “top killer of young Filipinos” ang mga iresponsabli nga mga drivers.
Segun sa data sa Philippine Statistics Authority, kapin sa 13,101 ka tawo ang namatay tungod sa road crashes sa 2023, ug 32 ka tawo ang mamatay kada adlaw tungod sa aksidente sa kalsada, diin lima niini mga bata.
Ang DOH nagpasidaan nga kung dili mahunong ang pagtaas sa aksidente, posibleng mahimong top cause of death sa Pilipinas ang road crashes alang sa sunod nga 10 ka tuig.
Ang DOH nag-awhag sa mas istriktong pagpapatuman sa mga balaod sa trapiko, lakip na ang speed limits, paggamit sa helmet, seatbelts, ug car seats para sa mga bata.
