CAGAYAN DE ORO CITY – Nakaandam na ang Overseas Workers and Welfare Administration o OWWA 10 nga moatiman sa pipila ka Pinoy workers nga manguli gikan sa nagkabanging kanasuran Israel ug Iran nga halos mag-semana na ang engkuwentro gamit ang nagkadaiyang klase sa mga armas didto sa tunga-tungang sidlakan.
Miingon si Eugene Mesias,officer-in-charge sa OWWA 10 Programs and Services nga hinoon negatibo pa nga adunay mga kabanay sa maong mga maapektuhang overseas Filipino workers nga midangop sa ilang buhatan aron sila pangusmutahon ug kung unsa na’y gihimo sa gobierno ngadto kanila.
Namahayag si Mesias nga ubay-ubay’ng mga taga-Northern Mindanao ang atua nag-trabaho sa maong kanasuran hinungdan nga naka-alerto usab sila kung adunay manguli gumikan sa kagubot sa maong kanasuran.
Anaa sa 30-mil ka Pinoy ang Israel ug dili mo-ubos sa 2-mil usab ang nakabase sa Iran diin tipik kanila ang gikan dinhi sa rehiyon.
Dugtong niini,gilayong itunol sa DSWD 10 ang pondo ubos sa Assistance to Individuals in Crisis Situations/AICS ug livelihood program alang sa pipila ka overseas Filipino workers nga apektado sa gubat sa Israel ug Iran.
Kini ang pasalig ni DSWD 10 regional director Ramel Jamen kung adunay ihap sa OFWs nga kabahin sa nanguli gikan sa duha ka nasud nga taga-Northern Mindanao region.
Namahayag si Jamen nga gitahasan na sila ni DSWD Secretary Rex Gatchalian nga ipa-aktibo ang ilang buhatan kung pananglitan adunay gikan sa rehiyon nga apil sa gipaubos sa voluntary repatriation sukad miulbo ang kagubot sa nagkabanging kanasuran.
