Nagmasulob-on ang mga Overseas Filipino Workers sa gakahitabo sa Pilipinas ilabe na sa liderato ni Presidente Ferdinand Marcos Jr.
Kini ang gibutyag ni Coco Naik, Filipino Migrant Chairperson ug Lanao del Sur President sa Partido Demokratikong Pilipino o PDP-Laban sa interbyu sa BOMBO RADYO.
Miingon si Naik nga kung niadto, kampante sila nga mapa-eskwela ang ilang anak ug makapalaag-laag sa bisan asang bahin sa Pilipinas, sukwahi na ang ilang pagbati karon.
Ang iyang mga paryente ug miyembro sa pamilya ang gasumbong kanila nga dili na nila mabati ang luwas nga pagpamuyo sa Pilipinas kay huyang man ang liderato ug nagsaka ang mga kaso sa kawat, patay ug uban pa.
Nakita sa mga OFWs ang dakung kalainan sa pagdumala ni kanhi Presidente Rodrigo Duterte batok kang Marcos nga halos nagsaka ang kriminalidad, kuraposyon ug kapubrehon sa nasud.
