
Nanawagan si Parañaque 2nd District Rep. Brian Yamsuan ngadto sa Kongreso nga gilayong ipasar ang mga gisugyot nga balaod nga maghatag og tax relief sa mga mamumuo ug gagmayng negosyo taliwala sa nagpadayong pagsaka sa presyo sa palaliton.
Lakip sa mga sugyot ang pagpataas sa income tax exemption gikan sa 250,000 pesos hangtud sa 450,000 pesos matag tuig ug pagwagtang sa 2% Minimum Corporate Income Tax (MCIT) alang sa micro ug small enterprises.
Matud ni Yamsuan, dako kining tabang aron makulangan ang mga galastohan sa mga pamilya ug mahupay ang palas-anon sa gagmayng mga negosyo, ilabi na nga niabot na sa 7.8% ang inflation niadtong bulan sa Oktubre.
Dugang pa sa kongresista, kinahanglang mahaom ang tax exemption sa kasamtangang presyo sa mga palaliton aron dili na samot nga maglisud ang mga mamumuo ug pamilyang Pilipino.
Gipatin-aw usab ni Yamsuan nga ang kasamtangang 250,000 pesos income tax exemption kay gitakda niadtong 2017 ubos sa TRAIN Law, apan tungod sa pagtaas sa presyo sa mga palaliton kay dili na kini igo nga kantidad aron maprotektahan ang mga mamumuo ug pamilyang Pilipino nga dunay ubos o kasagarang kinitaan.
Samtang, gipahayag sa kongresista nga makatabang ang pagwagtang sa 2% MCIT aron makulangan ang galastohan sa mga gagmyang negosyo, diin mamahimo nilang gamiton ang ilang matipid nga buhis alang sa operasyon ug aron usab mapabilin ang ilang mga empleyado. (raniel mahunyag)






