
Giangkon ni US President Donald Trump atol sa usa ka press conference nga misugot si Presidente Ferdinand Marcos Jr. nga kuhaon sa Pilipinas ang 100 porsiyento sa panginahanglan niini sa enerhiya ug mga produktong agrikultura gikan sa Estados Unidos sugod Enero 1, 2027, puli sa ubang mga tigsuplay sama sa mga nasud sa Middle East ug Brazil.
Matud ni Trump, kinahanglan nga mopalit ang Pilipinas gikan sa Estados Unidos, nga iyang gihulagway nga makatabang sa nasud kon adunay panagbangi batok sa China, tungod kay nagduhaduha siya kung motabang ba ang Brazil ug mga nasud sa Middle East sa maong kahimtang.
Apan, giklaro ni Marcos sa pakighinabi sa media sa Pilipinas human sa APEC Summit sa Shenzhen, China, nga ang tumong sa pakigsabot sa Estados Unidos kay mao ang pagpalapad sa mga tinubdan sa suplay ug pag-abli sa merkado sa Amerika aron makapalit ang Pilipinas og mas barato nga pagkaon ug enerhiya, ug wala siya maghisgot nga hingpit nang undangon ang pagpalit gikan sa ubang mga nasud.
Samtang nagpadayon pa ang negosasyon sa enerhiya, mipirma usab si Marcos og bulag nga memorandum of understanding uban kang Brazilian President Luiz Inácio Lula da Silva aron palig-onon ang kooperasyon sa agrikultura ug pag-atiman sa kahayupan. (raniel mahunyag)







