Gilaumang mahimong sistematiko ug nakabase sa aktuwal nga panginahanglan ang importasyon sa Pilipinas kung ilusad na ang MOA sa DA-BPI ug PSA isip lakang nga dugay nang gihangyo sa sektor sa agrikultura.
Atol sa pagdungog, naablihan pag-usab ang panginahanglan sa mas hugot nga koordinasyon ug data sharing tali sa mga ahensya sa kagamhanan aron maprotektahan ang panginabuhian sa mga mag-uuma samtang gisiguro nga igo ang suplay sa pagkaon sa nasud.
Isip tubag sa panawagan ni Senador Pangilinan, gikumpirma sa mga kadagkoan sa mga nalambigit nga ahensya nga nakapirma na sila sa maong kasabutan ug nag-agad na lamang sa iskedyul alang sa ceremonial signing sa dili pa kini hingpit nga ipatuman.
Dugtong niini, ang tumong sa maong lakang kay aron dili na maipit sa pagkalugi ang lokal nga mag-uuma dinhi sa nasud. (raniel mahunyag)



