Gibutyag ni National Bureau of Investigation National Capital Region Director Emeterio Dongallo Jr. nga nag-uswag na ang ilang case build up alang sa kasong economic sabotage human magpagawas og subpoena bahin sa mga direktor ug manager sa usa ka cold storage facility sa Valenzuela City, diin nadiskubre ang kapin sa 524 milyon pesos nga kantidad sa gidudahang smuggled agricultural products, lakip niini ang sibuyas.
Sa gipahigayong imbestigasyon sa NBI, gipangatarungan sa mga opisyal sa pasilidad nga panag-iya sa mga tenant o lokal nga mag-uuma ang nakatipig nga produkto, apan photocopy lamang sa lease contract ang ilang napresenta.
Matud ni Dongallo, wala pay nakit-ang ebidensya ang kawanihan nga maglambigit sa mga giingon produkto ngadto sa mga lokal nga mag-uuma ug imposibleng maka-ani ang mga mag-uuma og ingon adto kadako nga volume sa sibuyas.
Dugang pa ni Dongallo, tin-aw kini nga timailhan sa lapad nga hoarding aron manipulahon ang suplay ug pangwartahan ang merkado. (raniel mahunyag)




