CAGAYAN DE ORO CITY – Gidasig sa liderato ni incumbent Misamis Oriental Governor Peter Unabia ang job orders ug casual employees nga mangaplay sa trabaho ngadto sa buhatan ni incoming Governor Juliette Uy.
Kini alayon sa dili na kapugngan nga paghupas sa termino ni Unabia sa kapitolyo-probinsyal sa Hunyo 30 sa udto kay mohulip na ang administrasyon ni Uy.
Matud ni Misamis Oriental Provincial Legal Office head Atty. Neil Pacana nga walay imposible kung sulayan sa maong mga empleyado ang pagpangaliyupo sa bag-ong gobernadora kay dili naman sila sa bag-o sa mga trabaho sa kapitolyo.
Miingon si Pacana nga gitahas usab ni Unabia sa mga hingtungdang ahensiya nga ma-proseso ang mga gikinahanglang mga papeles aron ma-release pa ang mga angayang dawaton nga suhulan ug ubang mga benepisyo sa JOs ug casual employees sa kapitolyo ayha ang Hunyo 30.
Dumduman nga dili mo-ubos sa libo ka trabahante nga ubos sa maong istatus ang namiligro nga mahulipan kay diskresyon man sa bag-ong administasyon kung angay sila ipabilin o hulipan.
Hisayrang sulti pa ni Pacana nga anaa sa 800 ka JOs gikan sa provincial hospitals,laing gatos sa quarry sites ug wala pa’y labot niini sa mismong nakabase sa kapitolyo-probinsyal ang mabutang sa ataw-ataw sa ilang trabaho sa pagbiya sa Unabia administration.
