Gitubag sa palasyo ang hagit ni Kanhi Presidential Spokesperson Atty Harry Roque human makadawat sa report nga naglihok na ang mga assests sa Department of Justice aron siya sikopon sa The Hague Netherlands.
Mahinumduman nga nagpagawas sa vlog si Atty Roque ug namahayag sa “come and get me” .
Gitubag kini ni Palace Press Officer Atty Castro sa pinulungang “Wait and see”, ug namugos nga lig-on ang intelligence system sa gobyerno, sukwahi sa pagsaway ni Roque nga nabalot kini sa mga kapalpakan.
Hinoon, gitin-aw ni Castro nga nagpaabot pa ang Malakanyang sa pormal nga notice kabahin sa asylum application ni Roque, nga giingon nga gisalikway sa Netherlands.
Sa pagkutlo ning balita, adunay usa ka Dutch nga babaye ang namahayag sa social media nga nakita niya si Atty Harry Roque sa Germany, butang nga gihimakak ni Roque ug gitawag kini’g chismosa.
