CAGAYAN DE ORO CITY – Nangabalhog sa prisohan ang 130 ka personalidad epekto sa gikasa nga operasyon sa nagkadaiyang lower units palibot sa Northern Mindanao region ning semanaha.
Kini alayon sa walay hunong nga pagsumpo sa nagkadaiyang porma sa kreminalidad nga naglakip sa pagpakaylap sa ilegal nga droga.
Matud ni Police Regional Office 10 spokesperson Major Joann Navarro nga sa 53 ka magkalahing operasyon sa lower units, apil sa nasignit nila ang 61 ka suspek diin nabawian sa 163.812 gramos sa gitoohang shabu nga mikostar sa sobra un-milyon pesos.
Sa anti-illegal gambling operation, nasakote usab ang walo ka gitoohang mga sugarol diin nabawian sa mil-200 pesos nga kagamitan sa pasugal.
Nasulod na usab sa prisohan ang 57 ka pinangita sa balaod diin 11 kanila ang tratado nga pinaka-wanted persons.
Sa kampanya usab batok smuggling activities sa rehiyon,anaa sa sobra 20 milyones pesos sa mga inismagol nga sigarilyo ang nabawi gikan sa mga tawo nga nagpalusot niini.
Dugtong sa maong mga kalampusan, gidayeg ni PRO 10 regional director Brig Gen Rolindo Suguilon ang mga paningkamot ug mga kalampusan sa kapolisan alayon sa pagmintinar sa kahusay’g kalinaw sa rehiyon.
