CAGAYAN DE ORO CITY – Miprangka ang Uy transition team nga masudlan sa bag-ong mga empleyado ang kapitolyo-probinsyal sa pagsugod nila’g serbisyo sa katawhan sa Misamis Oriental sa Hulyo ning tuiga.
Miingon si Celso Abucejo,tigpamaba ni incoming Misamis Oriental Gov. Juliette Uy nga partikular nga maapektuhan niini ang dili kaayo kinahanglanon nga job orders ug casuals pag-abot sa bitbit nila nga mga abilidad ingon man katakos.
Nagpasabot nga mangayo sila’g pasaylo sa mga pamilya nga maapektuhan sa paghulip sa pipila sa mga empleyado kay normal kini sa pulitikanhong pagpuli sa pangamhanan.
Siya miingon nga higayon na usab nga ilang lingion kadtong mga pamilya nga mitoo ug misalig sa mga krusada ni Uy sa milabay’ng panahon sa kampanya sa eleksyon.
Gibutyag usab ni Abucejo nga tigumon nila ang mga ulo sa departamento sa kapitolyo sa pagka-adlaw’ng Lunes aron maplastar ang mga programa nga ubos sa pag-aprobar sa bag-ong gobernador.
Gilauman usab nga mopatuman si Uy sa ‘streamlining’ sa mga ulo sa departmento aron mas matutukan nila ang direktang mga tahas nga gisangon kanila sa gipangdala nga mga opisina.
