CAGAYAN DE ORO CITY – Dili lang maka-pokus sa pipila bahin sa Metro Manila ug Luzon provinces ang mando ni Pres Bongbong Marcos sa DPWH.
Kini may kalabutan sa mando niini nga imbestigaran ang govt infra projects nga gitumbok niya nga mga palpak ug gihimong gatasan sa kurapsyon sa mga ahensiya sa gobierno kuyog sa mga kontraktor.
Gibutyag ni Cagayan de Oro 2nd District Cong. Rufus Rodriguez nga angayang tibuok Pilipinas ang pagsusi sa maong mga proyekto kay aron masayran ang tinud-anay nga mga kahimtang sa mga proyekto nga gipondoha sa kagamhanan.
Siya miingon nga bukas kini sa kanunay nga masusi ang iyang mga nadala nga mga proyekto sa distrito dos nga susihon sa DPWH nga unang gipanganti ni Marcos nga pangkasuhan ang nalambigit sa mga anomaliya.
Dumduman nga sa ikaupat nga State of the Nation Address o SONA ni Marcos ning tuiga, gibatikos niya ang mga palpak flood control projects nga adunay dakong kalambigitan ang mga magbabalaod isip ilang mga proyekto nga giagi sa DPWH gamit ang winning contractors.
Hisayrang gipanganti ni Marcos nga ipangbulgar ang mga pangalan sa maong mga opisyal ug mga kontraktor nga nagka-konsabo sa mga palpak ug gihimong gatasan ang mga proyekto nga dili kasugakod pag-abot sa mga grabeng pagbaha.
