CAGAYAN DE ORO CITY – Gipaluyuhan ni Misamis Oriental Gov. Juliette Uy ang mga programa ug mga paningkamot sa Police Regiojnal Office 10.
Gihimo ni Uy ang mensahe nunot sa pagsilbi niya nga mamumulong sa pagtak-ob sa Police Community Relations diin mitala na sa ika-30 ka tuig nga pagpahigayon niini.
Gibutyag sa gobernadora nga andam sa kanunay ang iyang buhatan alang sa pagsuporta sa ikalig-on sa pagmintinar sa kahusay’g kalinaw ilabina nga nakabase sa Misamis Oriental particular sa Cagayan de Oro ang Kampo Alagar diin regional office sa PNP.
Giaghat usab niini ang kapolisan nga kanunay dili madala sa kainit sa politika apan mo-sentro sa ilang mga trabaho alang sa ikaayo sa katawhan sa rehiyon.
Hisayrang sa mao usab nga kalihukan,pipila sa mga pulis ug police units ang gihataga’g pasidungog sa ilang tagsa-tagsa ka performance nga pulos ubos sa superbisyon ni PRO 10 Regional Director Brig Gen Rolindo Suguilon ug ubang senior officers sa Kampo Alagar.
