BREAKING: Trump, nagdeploy sa duha ka submarino duol sa Russia

Nagdeploy na sa duha ka nuclear submarines si United States President Donald Trump, human sa makahagit nga komentaryo ni  kanhi Russian President Dmitry Medvedev.  

Miingon si Trump nga ang maong lakang maoy ilang tubag sa hulga ni  Medvedev, ug pagpahinumdum sa gobyerno sa Rusya nga may kapas ang Estadus Unidos nga mukontra atake sa gihinambog nga Soviet-era nuclear strike sa tropa ni Russian President Vladimir Putin.

 Subay sa social media post ni Trump, paspas niyang gimando ang pagmuntar sa mga Nuclear Submarines aron iposisyon sa atubangan sa Russia. 

Hisayran nga ang tensyon misaka human gikunhuran ni Trump ang deadline para sa Russia nga mohimo'g lakang aron tapuson ang pakig-gubat sa Ukraine.

 Mahinumduman nga gikan sa 50 ka adlaw, giputol ni Trump sa 10-12 ka adlaw ang pag-undang sa gubat sa duha ka nasud. 

Si Medvedev, nga karon deputy chairman sa Russia’s Security Council, mitubag nga ang mga ultimatum ni Trump nagpasabot nga gusto sa Amerika'g gubat.