CAGAYAN DE ORO CITY – Nahupay na ang kaguol ug nahulipan sa kalipay sa mga parokyano nunot sa pag-abli na’g balik sa Church of Saint John The Baptist sa lungsod sa Jimenez,Misamis Occidental.
Kini human buksi’g balik ang maong simbahan nga unang gitak-upan ni Ozamiz Archdiocese Archbishop Most Reverend Martin Jumoad,D.D gumikan kay adunay social media content creator nga nangluwa sa holy water font sa miaging semana.
Mismo si Jumuad ang nangulo sa pag-abli’g balik sa simbahan tinambungan sa mga kaparian ug katawhan niadtong Sabado sa hapon.
Gipasabot ni Jumoad nga tungod sa maong pagpasipala nga binuhatan sa usa ka babaye nga giingong nangluwa sa butangan sa bendita, napugos kini pagsirado.
Hisayrang nag-viral ang maong hitabo diin ang babaye nga giakusahan,gilayong nangayo’g pasaylo sa padre kora sa simbahan.
