Gipalig-on pa ni Senador Panfilo Lacson ang iyang unang pagbulgar kabahin sa naghinobra nga kurapsyon sa taga-gobierno kuyog ang pipila ka project contractors nga natahasan paghimo sa mga proyekto sa pipila ka bahin sa nasud.
Kini human giyagyag ni Lacson sa iyang senate privilege speech nga anaa lang sa 40 porsiento sa binilyong pondo alang sa mga proyekto batok sa pag-alkontra sa baha ang nagamit kay napaingon sa mga kurakot nga gikan sa kagamhanan.
Siya miingon nga subay sa iyang nahuptang mga impormasyon, anaa sa walo ngadto 10 porsiento sa pondo ang gitukob sa district engineer sa Department of Public Works and Highways/DPWH;5 hangtod 6 porsiento alang sa mga sakop sa Bids and Awards Committee o BAC; dos hangtod tres porsiento sa gitawag nga reseta;0.5 hangtod un-porsiento sa Commission on Audit ug 20 padulong 25 porsiento sa nagsilbing ‘funder.’
Gi-presenter usab ni Lacson ang pipila ka giingong flood control projects sa mga kontraktor nga gibulgar ni Pres Bongbong Marcos nga nagsilbing mga ‘kalag.’
Kini tungod kay sa pagsusi sa iyang inspection team particular sa probinsya sa Bulacan,walay bisan usa ka proyekto ang nagtindog diin gipondohan sa minilyong salapi gikan sa buhis sa katawhan.
Dumduman nga gibulgar ni Lacson nga anaa sa halos 70 ka kongresista nga nagsilbi nang kontraktor sa mga proyekto sa gobierno.
Hisayrang nag-imbestigar usab ang usa ka komitiba kabahin sa expose ni PBBM apan mismo si House Majority Leader Sandro Marcos ang miprangka nga angayang lahi nga mga ahensiya sa gobierno ang mohimo niini kay pipila man sa mga kongresista ang sentro sa alegasyon.
