Panalangin ug Panaghiusa ang tinguha sa Archidioces of Cagayan de Oro alang sa lapad nga lihok protesta nga ipahigayon dinhi sa syudad, sa adlaw’ng Domingo, Setyembre 21, adlaw usab sa pagdumdum sa dulom nga kagahapon sa Martial Law.
Subay sa official facebook page sa arkidiyosis ang “CDO Trillion Peso March” usa ka tinigom sa pag-ampo ug panaghiusa nga pagahimoon sa Setyembre 21, 2025, alas 8:00 sa buntag sa Gaston Park, Cagayan de Oro City.
Ang kalihukan naghangyo sa bag-ong kusog alang sa pagbag-o, konbersyon, ug pagkaayo sa tibuok nasod pinaagi sa panag-ambitay sa pagtuo ug paglaom.
Gidapit ang katawhan nga mulambigit, ingon usa ka pamilya ni Kristo, aron mapalig-on ang kamatuoran, hustisya, ug kalinaw.
Sa maong adlaw, tinguha sa kasimbahanan nga ipasidlak ang espiritu sa demokrasya ug pagkahiusa.
Didto sa kauluahan ang mga partisipante magtapok sa EDSA sila, ug ang katawhan sa syudad, magtapok sa De Lara.
Kini nga koneksyon, nagpahinumdom sa bug-os nga panaghiusa, ug solidarity sa lokal ug nasudnong pagpakabana.
Sama sa kasaysayan sa People Power, gilauman nga ang kusog sa panag-ampo makahimo sa positibong epekto sa politikal ug sosyal nga pag-uswag.
Ang pagsul-ob sa PUTI nga sinina simbolo sa kalinaw, ug kaputli sa mga paningkamot alang maayong kabag-uhan sa Pilipinas.
Gihagit sa arkidiyosis ang tanan nga magpakita sa disiplina, malasakit, ug mag-uban sa pagkahiusa atol sa pagmartsa ug pag-ampo.
Nagtuo ang mga kaparian nga pinaagi sa paghiusa sa tingog, pagtuo, ug kasingkasing, mas mapalig-on ang panan-aw sa Pilipinas nga puno sa paglaom, hustisya, ug pag-ayo.
