Mipasabot ang Department of Agriculture – Region 10 nga kasamtangang gipadayon ang pagsemento o “concreting” sa mga Farm-to-Market Road (FMR) nga gipatukod sa mga hinterland barangays sa lungsod sa Cagayan de Oro.
Gibutyag kini ni Bernie Daba, City Agriculture Officer, sa interbyu sa Bombo Radyo.
Gitin-aw ni Daba nga ang mga proyekto, wala magsumikad sa CDO-LGU, apan gikan kini sa nasudong budget. Gibutyag ni Daba nga matag tuig adunay 10% counterpart allocation ang dakbayan aron masuportahan ang pagpapatukod niini.
Si Daba miingon nga sa District 2, ang proyekto sa Barangay Bugo anaa na sa 40% sa aktwal nga accomplishment.
Samtang ang sa Barangay Cugman nakapending tungod sa kakulangan sa permits ug clearances.
Ang uban pang mga barangay sama sa Indahag, Tablon, FS Catanico ug Balubal naghulat pa nga ma-awardan ang proyekto tungod kay giproseso pa ang pag-download sa pondo gikan sa Department of Agriculture central office pinaagi sa Special Allotment Release Order (SARO).
Sa District 1, anaa na sa 91% ang aktwal nga accomplishment, lakip ang Barangay Dansolihon nga adunay 90 % sa concreting sa FMR.
