Gikondenar sa kampo sa depensa ang desisyon sa International Criminal Court (ICC) nga nagdumili sa hangyo alang sa temporaryong pagpagawas ni kanhi Pangulong Rodrigo Duterte, gikan sa selda sa ICC.
Gibutyag ni Atty. Nicholas Kaufman nga 80 anyos na ang piniriso ug adunay sakit, busa, angayan lamang nga ihatag kanila ang pagpabor subay sa garantiya gikan sa estado.
Naglaum ang depensa nga usbon sa ICC Appeals Chamber ang desisyon.
Sa pagkakaron, si Duterte anaa sa kustodiya sa ICC sukad siya gi-extradite sa Pilipinas niadtong Marso.
Sukad niadto, duha na ka beses nga gisalikway sa korte ang ilang hangyo alang sa interim release. Usa sa mga hinungdan sa pagbalibad sa hangyo mao ang mga pamahayag ni Bise Presidente Sara Duterte kabahin sa giingong “pagluwas” sa iyang amahan gikan sa prisohan sa The Hague.
Sa 23-ka pahinang desisyon nga gipagawas niadtong Oktubre 10, giingon sa ICC Pre-Trial Chamber nga ang mga pamahayag ni VP Sara niadtong Hulyo ug Agosto nagpakita sa “pagdumili sa proseso sa hukmanan” ug sa “tinguha sa iyang pamilya nga tabangan siya nga makalikay sa pagpasaka’g kaso.”
Gibutyag sa korte nga milakmit si Duterte sa iyang anak nga gusto niyang mopauli sa Davao City kon siya hatagan sa kagawasan.
Kini nga linya alang sa ICC usa ka pagsupak saad sa depense nga magpabilin si Duterte sa nasud nga mu-adaptar kaniya ug dili mupauli sa Pilipinas.
Gumikan niini, gipamugos sa ICC nga kinahanglan magpabilin sa kustodiya si Duterte samtang naghulat pa sa kumpirmasyon sa mga kaso sa crimes against humanity ug murder may kalabutan sa libuang ihap sa mga tawong napatay sa kampanya batok sa ilegal nga droga.
Gikalipay ni ICC Special Assistant to counsel Atty Kristina Conti ang pagbasura sa korte sa ikaduhang petisyon ni Duterte.
