Gikinahanglan nga palig-onon sa gobyerno ang tinuod nga pagpatuman sa Philippine Mental Health Law, ilabi na karon nga nag-atubang ang mga Pilipino sa daghang mga hagit ug krisis sa kinabuhi.
Kini maoy panawagan ni Fr. Warren Tagupa, RPM, gikan sa Archdiocese sa Cagayan de Oro, sa pagsaulog sa World Mental Health Day sa miaging Biyernes.
Matod pa ni Fr. Tagupa, dili angayan himoong katarungan sa gobyerno ang “resilience” sa mga Pilipino aron dili na kini molihok sa pagpatuman sa balaod.
Gihagit usab niya ang mga opisyal nga hatagan sa tinuod nga pagtagad ang mental health sa katawhan, tungod kay dugay na kining napasagdan nga isyu.
Sa laing bahin, ipahibalo ni Fr. Tagupa nga padayon ang simbahan sa pagpaningkamot sa pagpanalipod sa espirituhanong panginahanglan ug sa paghatag og paglaom sa katawhan ug sa nasud sa panahon sa mga krisis ug katalagman. (James Oliver)
