UPDATE: Nagdumili una ang kapulisan sa pag-ila sa ngalan sa pulis nga nasapon sa pagmaneho sa pribadong sakyanan nga puno sa gi-ismagol nga sigarilyon didto sa Iligan City.
Kini ang gibutyag ni Police Captain Reynaldo Alamin, Highway Patrol Group – Iligan Team Leader, sa programang Zona Libre.
Miingon si Capt Alamin, nga usa ka Police Staff Sergeant (PSSG) ang ilang nasikop ug aktibo kining na-deploy sa Municipal Police Station sa Balo-i Lanao del Norte.
Una niini, niadtong Oktobre 10, nasanta sa grupo ni Alamin ang sakyanan nga dala sa aktibong pulis nga nagdala sa P150,000 street value sa gitoohang smuggled cigarettes.
Misulay sa pag-ikyas sa checkpoint ang sakyanan busa ilang gipara.
Sa inspeksyon, nakit-an ang mga kinartong sigarilyo nga nagkantidad sa ₱150,000 ug service firearm sa pulis nga 9mm pistola nga loaded sa 30 ka bala.
Gawas sa pulis, arestado usab ang iyang kauban nga tolo ka hamtong ug usa ka menor de edad. Silang tanan nag-atubang sa kasong resistance and disobedience to a person in authority, ug paglapas sa customs and anti-smuggling laws.
Gidayeg sa Acting Chief PNP Jose Melencio Nartatez ang paspas ug “coordinated action” sa HPG, nga nagpadayag sa determinasyon sa PNP sa pagsunod sa mando ni Presidente Ferdinand Marcos Jr., batok sa smuggling ug korapsyon.
