Napaig-patay ang tibuok pamilya human gilamoy sa kalayo ang ilang puy-anan sa Block 10, Lot 32, Phase 2, Mega Heights Subdivision sa Brgy Gusa ning syudad sa miaging Lunes sa gabii.
Unang gireport nga missing ang tulo ka biktima ug milampos ang Bureau of Fire Protection [BFP] ug Scene of the Crime Operatives (SOCO) sa pagrekober sa ilang lawas pipila ka oras sa pag-responde.
Giila ang mga namatay nga sila Cencino Talara, 66 anyos, kuyog ang iyang kapikas nga si Annie Rose Talara, 36 anyos, ug ilang 13 anyos nga anak nga si alyas Mary.
Namahayag si Fire Senior Inspector Louis Roy Solamo, station commander sa Lapasan Fire Station, nakaplagan sa ilang bombero ug sa SOCO ang lawas sa mga biktima nga nagtapok sa usa ka bahin sa ilang puy-anan.
Nagpabiling misteryo ang pagdilaan sa kalayo ilabe na nga nasayud ang ilang mga silingan nga walay kutay sa kuryente ang mga biktima kapin dekada na ang nakalabay.
Hinoon, migamit sa solar lights ang mga biktima ug usa kini sa gilantaw nga anggulo kung kini ba ang hinungdan sa sunog.
Wala usab gipakilid sa BFP ang posibilidad nga tinuyo ang pagsunog sa balay.
