CAGAYAN DE ORO CITY – Napuno sa emosyon ang mga anak nga kalit nabiyaan sa magtiayong Elly ug Thelma Ubatay,managsama nga 60 anyos nga taga-Kitaotao,Bukidnon.
Kini human mismo ang mga anak maoy mitumbok nga ilang ginikanan ang hingpit nakalutan sa search and retrieval teams nga sobra tulo ka adlaw nga nangita kanila kay natabunan sa nahugno nga pangpang sa Brgy Palicapao,Quezon niadtong Sabado sa gabii.
Sa pagka-rekober sa mga biktima, gisaysay ni Quezon Municilal Government spokesperson Forts Cabarde nga naggakos pa gihapon ang mga biktima hangtod sa katapusang ginhawa sa ilang pagka-buhi ning kalibutana.
Kini ang rason nga emosyonal pag-ayo ang ilang mga anak nga misaksi sa paghaw-as sa backhoe sa mga patay’ng lawas sa mga biktima gikan sa nahugnong yuta.
Dumduman nga pauli na ang mga biktima sakay sa gisakyang bao-bao niadtong gabii sa Sabado dihang nahugno ang pangpang rason nga nadala pagkahulog ang dakong bahin sa kalsada diin sila kabahin sa napadulong sa pinaka-ubos sa pangpang.
Sa pagkutlo ning balita, gitakdang ipahiluna ang mga patay’ng lawas sa mga biktima aron mahatagan sa desenting haya ug paglubong sa labing dali nga panahon sa maong lugar.
