Human sa malampusong pag-host sa Malaysia sa ika-47 nga ASEAN Summit ug mga kauban nga summit niadtong Oktubre 26-28, 2025, opisyal nga gisangon sa Pilipinas ang Chairship sa ASEAN alang sa tuig 2026.
Ang tema sa pag-host sa Pilipinas sa ASEAN 2026 mao ang ‘Navigating Our Future, Together’, nga nagpunting sa pagpalig-on sa kalinaw ug seguridad sa rehiyon, pagpasiugda sa mga koridor sa kauswagan, ug pagpalambo sa gahum sa katawhan.
Gipalanog ni Presidente Marcos Jr. ang mga prayoridad nga gisang-at sa Pilipinas isip Chair sa ASEAN nga magsilbing giya sa tibuok rehiyon padulong sa kaugmaon nga puno sa kalinaw, kauswagan, ug katawhan nga sentro sa mga palisiya.
Gipadayag usab sa Presidente nga ang tumong sa Pilipinas mao ang pagpadayon sa momentum sa ASEAN ug ang paglunsad sa ASEAN Community Vision 2045 uban sa tinud-anay nga katuyoan. Lakip sa gisuportahan sa Pilipinas ang mas lawom nga integration sa Timor-Leste ngadto sa ASEAN.
Gidayeg sa presidente ang Malaysia sa maayong pagpangulo sa ASEAN ug misaad nga ipadayon ang lig-on nga papel sa rehiyon isip usa ka puwersa sa nagbag-o nga kalibutan.
Gipatin-aw sa Presidente nga ang tumong sa Pilipinas dili ang pagbulag sa mga naunang Chairship, kondili ang pagtukod sa kolektibong kalampusan sa mga miaging liderato. Gilaumang “goal” sa Pilipinas mao ang panaghiusa sa tanang miyembro sa ASEAN, sa Sekretaryat, ug sa mga eksternal nga kauban.
Sa espiritu sa panaghiusa, giimbitar sa Presidente ang tanang kauban sa ASEAN nga moanhi sa Pilipinas aron sa pagpadayon sa panaghiusa ug panagbinayloay alang sa mas maayong kaugmaon.
