Libre nga motorela rides ang gitanyag sa City Government sa Cagayan de Oro alang sa mga mubisita pasulod ug paggawas sa City Memorial Park atol sa pagtamod sa Adlaw sa mga Santos ug mga Kalag gikan Oktubre 31 hangtod Nobyembre 2.
Kini ang gibutyag ni Janboy Actub, tigpamaba ni City Mayor Rolando Klarex Uy.
Miingon si Actub nga inisyatiba kini sa syudad tungod kay limitado ang espasyo sa dalan padulong sa sam-ang, ug aron malikayan ang pagpunsisok sa mga sakyanan.
Una niini, mihatag katin-awan ang mga tagdumala sa City Cemetery nga walay VIP ug gidili ang pagsulod sa mga pribadong sakyanan sa menteryo, gawas sa mga transport vehicles sama sa ambulansya ug patrol sa kapulisan.
Gidili usab ang pagdagkot sa kandila nga isandig sa lapida o semento kay posible kining tinubdan sa sunog.
Gihangyo sa City Government ang tanan nga mubisita sa mga sam-ang sa syudad nga mosunod sa mga guidelines ug direktiba sa pagduaw, ilabe na sa pagmintinar sa kalimpyo ug kalinaw .
