Live wire nga midapat sa atop maoy inisyal nga hinungdan sa sunog nga milamoy sa 28 ka mga balay sa Barangay Macabalan, ning syudad, sa miaging gabii. Kini ang gibutyag ni Barangay Chairman Saniel Raypon, taliwala sa pamugos sa tagbalay nga wala silay koneksyon sa kuryente, bisan pa nga daghang nakasaksi nga nagsugod ang kalayo sa balay sa usa ka wala pa panganli nga residente. Ang insidente miresulta sa pagka-displaced sa bana-bana 52 ka pamilya, nga posibleng magpasko na lang sulod sa covered court sa Barra tungod kay wala na silay puy-anan nga mabalikan. Mupagawas usab ang konseho sa ilang calamity funds alang sa mga nasunugan. Nanawagan si Raypon sa mga may malumong kasing-kasing nga motabang sa mga biktima, ilabi na sa materyales alang sa ilang pagpanukod sa bag-ong balay.
