Magkahiusa sa pag-ampo. Kini ang panawagan ni Cardinal Pablo Virgilio David, presidente sa Catholic Bishops Conference of the Philipines CBCP alang sa ikaduhang hugna sa Trillion Peso March Rally sa katapusang adlaw sa Nobyembro. Gi-awhag ni David ang tanan tumutoo ni Kristo nga barugan ang pakigbisog batok korapsyon. Ang kalihukan gipangulohan sa Episcopal Commission on Social Action, Justice and Peace ug Caritas Philippines. Tumong niini ang paghatag sa tinuod nga reporma alang sa nasud, aron dungan nga masayran ang kamatuoran, luyo sa trilyones nga salapi nga mi-awas sa kaban sa Pilipinas ug personal nga gibulsa sa pipila ka mga kurap nga opisyal ug trabahante sa gobyerno.
