Wala kalinggawas sa expose ni kanhi Ako Bicol partylist Rep Zaldy Co ang anak ni Pres Bongbong Marcos nga si House Majority Leader Sandro Marcos nga representante gikan sa unang distrito sa Ilocos Norte.
Kini human akusahi ni Co si Sandro nga nakakuha sa sobra 50 bilyon pesos nga budget insertions sa milabay’ng katuigan sukad nangulo ang Marcos administration sa nasud.
Namahayag si Co sa iyang ulahing video expose nga unang nakahimo’g budget insertions si Sandro sa 9.636 billion pesos sa tuig 2023.
Nasundan kini sa 20.174 billion pesos sa 2024 ug laing 21.127 billion pesos ning tuiga.
Kini nga pagbulgar ni Zaldy ang gihimo niya pipila ka adlaw gikan sa pag-akusar kang Pres Marcos nga nakadawat sa 56 bilyones pesos nga kickbacks diin katunga sila ni ex-House Speaker Martin Romualdez;wala pa’y labot ang 100 billion pesos ning tuiga ug laing 97 bilyones pesos nga gisulod sa National Expenditure Program alang sa 2026.
Sa pikas bahin,gilayong mi-resbak si Sandro batok kang Zaldy.Gitawag kini ni Sandro nga bag-ong sakop sa mga Duterte si Co.
Namugos ang batan-ong Marcos nga dili expose apan destabilisasyon ang gihimo ni Co batok sa liderato ni Marcos Jr.
