Dismayado ang Kapisanan ng mga Broadcaster ng Pilipinas (KBP) sa kontrobersyal nga pahayag ni Misamis Oriental Governor Juliette Uy, nga nag-ingon nga bayas ang mga media practitioner, atol sa flag raising ceremony sa Kapitolyo Probinsyal niadtong Lunes.
Si Tito Monterde, KBP Standards Committee Chairman, mipahayag sa BOMBO Radyo nga posible nga adunay misunderstanding sa gisulti sa gobernadora, tungod kay nagresulta kini sa nabahin nga reaksyon sa katawhan ug sa mga sakop sa prensa.
Giangkon ni Monterde nga kinahanglan kini mahatagan sa klarong katin-awan, ug gihagit ang kapitolyo nga nganlan kung kinsa kining mga media personalities nga gapangatake kaniya nga walay basehan.
Nagpasalig usab siya nga andam ang KBP nga motabang kung gikinahanglan, basta dili lang mangdaut sa operasyon sa kapitolyo ug sa administrasyon ni Gobernadora Uy.
Una niini, gihangyo ni UY ang tanan media sa syudad nga magpabiling patas sa pag-atake o pag-report bahin sa mga politiko.
Sa katapusan, nagpadumdum ang KBP sa tanan miyembro nga imentinar ang propesyonalismo ug taas standard sa organisasyon, aron mapreserbar ang kredibilidad ug integridad sa industriya sa pagsibya.
