CAGAYAN DE ORO CITY – Mikalas sa upat ka kinabuhi sa tawo ug laing upat ang angol ang ngilngig nga bangga tali sa fuel tanker truck ug bao-bao sa tungason nga bahin sa Upper Zone 1,Brgy Sta. Ana,Tagoloan,Misamis Oriental kagahapon sa hapon.
Sa inisyal nga imbestigasyon ni Police Staff Sgt Gil Llanares,traffic investigator sa Tagoloan Police Station nga giila ang duha ka dead on the spot nga sila Baby Jane Tupaz,33 anyos ug Silvestra Tongco,60 anyos nga pulos taga-Bagong Silang,Brgy Sta Inis,Malitbog,Bukidnon.
Sumala sa pakisusi nga nawad-an sa kuntrol ang trak nga palugsong ang direksyon hinungdan nga gikabangga ang bao-bao nga kargado sa upat ka pasahero.
Tungod sa kakusog sa impact,nahulog ang bao-bao kuyog ang duha ka anak ni Baby Jane nga nag-edad pa sa usa ka tuig ug 4 anyos ingon man ang drayber.
Naipit usab ang truck driver ingon man ang helper niini rason nga gitabanga’g haw-as sa rescue teams.Paspas gidala sa Northern Mindanao Medical Center ang mga buhi pang mga biktima apan paglabay sa pipila ka oras,apil sa nakabsan ang uno-anyos nga anak ni Baby Jane ug ang drayber sa trak.
Nasuta nga gikan nag-seminar sa simbahan si Baby Jane alang sa iskedyul sa kasal unta niini sa dihang sa iyang pag-uli,gikadungan niya’g sakay si Silvestra sa tricab nga nag-resulta sa dugu-ong aksidente.
