Nagpadayag sa ilang pagpakita sa solidarity ang grupo sa mga estudyante sa Pilipinas alang sa katawhan sa Venezuela nga nag-atubang karon sa krisis human sa pag-atake sa Estados Unidos sa nasud. Namahayag si League of Filipino Students (LFS) Spokesperson Kyla Benedicto sa Bombo Radyo nga bisan pa man lain-lain ang nasud, pareho ra ang kahimtang sa Venezuela ug Pilipinas, ug sa ubang gagmay nga estado, nga nag-antos sa kawad-on ug sa kakulang sa tibuok gahum ubos sa ilang hudikatura. Butyag ni Benedicto nga gikondena sa ilang grupo ang lakang sa US, nga iyang gihulagway nga pagpang-abuso sa gahum ug pagpanghilabot sa gagmay nga nasud. Naghinaot usab ang grupo nga ang tanang nasud nga nakigbatok sa imperyalismo sa Estados Unidos makab-ot ang ilang kagawasan ug kalinaw. (JAMES OLIVER)
