Wala naglisod sa pagkolekta sa basura ang buhatan sa City Local Environment and Natural Resources Office (CLENRO) human sa gipahigayong traslacion sa Itom nga Nazareno sa syudad.
Namahayag si CLENRO Manager Bing Mabilen sa Bombo Radyo nga dili kaayo dako ang garbage generation atol sa kalihokan, rason nga hapsay ra ang ilang pagpanlimpyo.
Gipasabot ni Mabilen nga bisan pa man sa dul-an 23-mil ka mga deboto nga mitambong, wala nila namatikdan ang pagkakatag sa basura tungod kay nag-instalar sila og mga trash bin sa mga kadalanan padulong sa Nazareno Church.
Malipayon usab matod pa ang buhatan nga dali ra nilang nakolekta ang mga basura, tungod sa maayong pagsunod sa katawhan sa mga abiso sa otoridad.
Ilabi na nilang gikalipay nga daghan sa mga deboto ang nagdala og water bottles, rason nga gamay ra ang nakolektang plastic waste atol sa procession.
