GIDUDAHAN sa grupong Hakbang ng Maisug–Cebu ang kamatayon ni kanhing DPWH Usec. Maria Catalina Cabral, taliwala sa nagkainit nga isyu sa flood control scandal sa nasud.
Sumala ni Hakbang ng Maisug–Cebu Lead Convenor Jun Abines, nagpabiling kwestyonable ang daghang anggulo sa kamatayon sa kanhing opisyal, hinungdan nga lisod para kanila tuohan nga natural lamang ang nahitabo.
Butyag ni Abines, nakapukaw og duda ang mga detalye sa dili husto nga tsinilas nga gisul-ob ni Cabral atol sa iyang kamatayon, lakip na ang kakulang sa klarong police documentation ug wala pagpakita sa iyang nawong ug haya.
Dugang pa ni Abines, kasagaran sa mga Pilipino magpa-autopsy ug magpahaya sa patay, apan matod pa, wala kini gihimo sa pamilya ni Cabral, nga misamot pa sa mga pangutana kabahin sa insidente.
Para ni Abines, dili na katingad-an nga magpadayon ang mga duda, ilabi na kay giingong giputos dayon ang lawas ug adunay panghinala nga dili gayud kini mao ang lawas ni Cabral, kondili usa ka karaang patayng lawas. (James Oliver)
