Gipasiugda ni Cagayan de Oro 1st District Representative Cong. Lordan Suan ang pagpasa sa balaod batok sa political dynasty human siya mipasaka sa House Bill 06799 kagahapong adlawa.
Inubanan sa ubang mga kongresista nga nagpasa usab sa ilang tagsa-tagsa ka bersyon, gisugdan kagahapon ang unang deliberasyon sa Committee on Suffrage and Electoral Reforms kabahin sa maong balaod nga nagtumong ipatuman ang Article II, Section 26 sa 1987 Constitution batok sa political dynasty sa nasud.
Sumala ni Cagayan de Oro 1st District Assistant Director Bert Amplayo, bisan pa man nga nalakip sa usa ka political dynasty si Cong. Suan, andam kuno kini nga mubiya sa politika kon gikinahanglan, mapasaka lang ang balaod nga dugay na matod pa nga wala hatagi og hustong pagtagad sa gobyerno.
Dugang pa ni Amplayo, sa bersyon sa House Bill ni Cong. Suan, gusto ipagbawal ang pagdagan sa politika sa mga sakop sa political dynasty hangtod sa ika-upat nga lebel o 4th degree sa kadugo, nga naglakip sa mga ig-agaw, paryente, igsoon, ug mga apo. (James Oliver)
