Nanawagan ang mga reklamante sa Navona Court Subdivision sa Local Government Unit (LGU) nga magpahigayon og komprehensibong assessment sa tanang poultry farm nga nagpalibot sa Barangay Lumbia, tungod sa padayong grabe nga pagdagsa sa mga langaw sa ilang lugar.Sumala ni Neil Obsioma, residente sa maong subdivision, naapektuhan na ang adlaw-adlaw nga kinabuhi sa mga residente tungod sa problema. Giklaro ni Obsioma nga dili tinood nga wala pay nagkasakit sa ilang area, kay adunay na’y mga residente nga nakasinati og gastrointestinal problems ug posibleng contamination.Gipasabot usab ni Obsioma nga dili pa kompermadong gikan ra sa poultry farm sa Baungon ang tinubdan sa mga langaw, tungod kay aduna usab mga poultry farm nga duol mismo sa Barangay Lumbia.Tungod niini, gihangyo niya ang LGU nga magpahigayon og hustong inspeksyon ug assessment aron masuta ang tinubdan sa problema. Lakip sa iyang gihangyo ang pag-usisa kon adunay valid permit ang mga farm ug kon nasunod ba ang sanitation ug waste disposal standards sa ilang operasyon. (James Oliver)
