Gitin-aw ni City Agriculture Office nga dili maapektuhan ang supply ug presyo sa mga utanon ug isda sa merkado sa dakbayan sa Cagayan de Oro, bisan pa sa epekto sa nilabay nga Bagyong Basyang sa mga mananagat, fish cage raisers, ug mag-uuma.
Sumala ni Engr. Bernie Daba, City Agriculture Manager, base sa ilang assessment, dili tanang barangay nga adunay mga tanom ug produksyon sa mais ug gulay ang naapektuhan sa bagyo.
Matod pa niya, ang mga naapektuhan lamang mao ang Barangay Puerto, Agusan, Tablon, FS Catanico, ug Canitoan, lakip na ang coastal areas sa syudad, diin Barangay Cugman ang grabehang naapektuhan.
Gipatin-aw usab ni Daba nga wala maapektohi ang mga humayan sa syudad, tungod kay gamay na lamang ang area niini nga anaa sa Barangay Mambuaya ug Barangay Taglimao, nga mikabat ra og kapin sa 40 ka ektarya sa kinatibuk-an.
Giawhag karon sa City Agriculture Office ang mga mag-uuma ug mga mananagat nga wala pa makapasa sa ilang damage reports nga magpahibalo dayon sa buhatan, aron malakip sila sa assessment ug mahatagan sa igong tabang sa syudad para makabangon ug makabalik sa normal nga panginabuhian.
Source: Zona Libre Co written by: (James Oliver)
