Nagatoo si Atty. Joel Mahinay sa Union of Peoples Lawyers in Mindanao (UPLM) nga dili na kinahanglan ipaagi sa social media ang pagtubag sa Bise Presidente kabahin sa mga hagit ug akusasyon nga gihimo sa grupong Akbayan ug uban pang civil society groups nga padayon nagsang-at og Articles of Impeachment batok kaniya.
Sumala ni Mahinay, dili kahadlok sa posibleng tulobagon ang kahulugan sa desisyon sa bise presidente nga dili na motubag pinaagi sa social media sa mga reklamo batok kaniya.
Butyag ni Mahinay, husto ug sakto lamang nga ipaagi sa insaktong plataporma o legal nga venue ang pagtubag sa bug-at nga mga akusasyon, ilabi na nga ang impeachment usa ka pormal ug legal nga proseso.
Matod pa niya, pinaagi sa pagsunod sa insaktong impeachment proceedings, didto mahimong mapamatud-an kung ang bise presidente adunay tinuod nga tulobagon o nakalapas ba sa Konstitusyon ug sa batakang mga balaod sa Pilipinas. (james oliver)
