WALAY PILI ang mahimong mabiktima sa online scam karong panahona, sumala ni Regional Anti-Crime Unit 10 Assistant Chief PLTCOL Junmark Cana.
Matod pa niya, lalaki man o babaye, posibleng mabiktima sa synthetic relationship o love scam.
Butyag ni Cana, base sa ilang nakalap nga datos, kasagaran sa mga biktima sa online scam mao ang mga hamtong, mga retirado, ug kadtong nag-inusara na lang sa kinabuhi.
Miingon si Cana nga dili na basta-basta ang pagpang-scam karon, tungod kay ginabuhat sa mga scammer ang lawom nga pagtuon sa kinabuhi sa ilang target.
Lakip niini ang pagsusi sa personalidad, kahuyang sa emosyon, kahimtangan sa pamuyo, trabaho, ug uban pang personal nga detalye.Matod pa niya, pinaagi niini mas sayon masulod sa mga scammer ang pagsalig sa biktima.
Pinaagi sa pakig-istorya nga murag tinuod ug puno sa pagbati, makuha sa mga scammer ang kumpiyansa sa ilang target, ug sa ulahi mangayo og kwarta o personal nga impormasyon nga magamit sa pagpanglimbong. (James Oliver)
