Magpahigayun na ang City Government sa Cagayan de Oro sa final coordination meeting karong semana kauban ang City DILG ug mga concerned offices sa syudad alang sa pag-sugod sa implementasyon sa Anti-Epal Law.
Kini human nga nagmando ang opisina sa DILG nga tangtangon ang tanang ngalan, hulagway, ug simbolo nga makaila sa mga politiko ug politikal nga partido sa tanang proyekto, signages, sakyanan, ug materyales nga gipondohan sa gobyerno — gikan sa lebel sa barangay hangtod sa national.
Gipahibalo usab nga naaprubahan na ang ordinansa nga musuporta sa Anti-Epal memorandum sa DILG, nga muhaom sa syudad sa Cagayan de Oro.
Matod pa sa lokal nga panggamhanan, mas hugot na ang rason nga tumanon ang pagbaklas sa tanang materyales nga adunay political affiliation. Ang pagpatuman sa maong palisiya pangunahan sa local government units sa syudad kauban ang composite teams sa City Engineering Office, City Public Department, Roads and Traffic Administration, CLENRO, ug uban pa.
(James Oliver)
