Gibulgar sa Armed Forces of the Philippines (AFP) nga upat sa 18 ka kanhi retired Marines nga gipresentar sa abogado nga si Levito Baligod walay labot sa Philippine Marine Corps, samtang ang uban kanila adunay daot nga record sa serbisyo.
Kini ang pahayag ni AFP spokesperson Colonel Francel Margareth Padilla, kinsa nagpasabot nga ang ilang basehan mao ang official records gikan sa Philippine Navy.
Namahayag ang AFP nga dili tanan sa grupo nga giingon nga “bagmen” ni kanhi Deputy Speaker Zaldy Co sakop sa Marine Corps, ug ang uban pa kanila wala sukad ma‑enlist isip Marines.
Gumikan niini, gitug-an ni Padilla sa prensa, nga mulunsad sila sa ilang internal nga imbestigasyon aron masuta ang tinuod nga background sa mga indibidwal nga nag‑angkon nga nagdala sa maleta nga puno sa salapi, ngadto, padulog sa mga puy-anan sa mga opisyal sa gobyerno.
Sa laing bahin, mitin-aw ang opisyal nga ang mga alegasyon nga gipresentar ni Baligod kinahanglan pa nga mabalidar ug dili angay nga ipakatag sa publiko nga walay klarong ebidensya.
Andam ang AFP nga mupasaka’g kaso sa mga tawong nagtinguha sa pagguba sa imahe ug integridad sa ilang han-ay kay posibleng ang pagguba sa institusyon ang tumong sa nagtumaw nga mga bagman ni Co.
