Dili pa ma tratar nga “dead on arrival” ang gituki nga duha sa upat ka impeachment complaint batok kang Vice President Sara Duterte.
Kini ang prangka nga reaksiyon ni Atty. Rhobert Maestre, board director sa IPB Misamis Oriental, human alang kaniya, nagpanukad na ang mga proponent ug endorser sa maong reklamo.
Si Maestre miingon nga wala na siya makurat kung nganong subli gi-revive ang kanhi mga reklamo sa bise presidente nga unang gidismis sa korte suprema.
Mipasabot usab ang abogado nga sa pagtuki sa “sufficiency in substance” dinhi masuta kung angayan ba dunggon ang duha ka reklamo.
Mahinumduman nga unang namahayag si Maestre sa BOMBO RADYO nga ang proseso sa impeachment dili basta-basta mapahunong kung adunay makitang basihanan sa substance sa reklamo.
Alang kaniya ang korte suprema lamang ang katapusang arbiter sa legalidad, apan samtang wala pa kini makadesisyon, ang Kongreso adunay katungod nga motuki ug mosusi sa mga reklamo nga gisang-at.
Sa iyang panan-aw, ang pagbalik sa mga karaang isyu batok sa Bise Presidente nagpakita nga adunay hugot nga determinasyon ang mga proponent ug endorser sa pagpadayon sa kaso.
Bisan pa man, iyang giingon nga ang proseso kinahanglan nga magpabilin nga patas ug dili gamiton alang sa pulitikal nga interes, aron masiguro nga ang hustisya ug katinuoran mao gyud ang molabaw sa tanang deliberasyon.-
