Walay kabalaka ang grupo nga Mahalin Natin ang Pilipinas sa nagpadayong dagan sa impeachment complaint batok kang Sara Duterte.
Sumala kang Engr. Dioric Gavino , Secretary General sa maong grupo ug usa sa mga supporter sa bise presidente, ilang tan-aw nga politikal lamang ang maong lihok ug gitumong sa pagwagtang sa impluwensya sa pamilya Duterte sa politika.
Matud ni Gavino nga andam ang kampo sa bise presidente sa pagtubag sa tanang alegasyon nga gilabay batok kaniya kung mosangpot sa pormal nga paghusay ang impeachment complaint.
Dugang pa niya nga ilang pagtan-aw, kadaghanan sa mga alegasyon batok kang Duterte pawang hearsay o walay lig-on nga basehan.
Giingon usab ni Gavino nga bisan unsa pa ang mahimong resulta sa proseso sa impeachment, magpadayon gihapon ang ilang suporta sa bise presidente.
Samtang naghulat sa sunod nga mga lakang sa proseso, gilauman sa grupo nga mapatin-aw sa bise presidente ang tanang isyu nga gilabay batok kaniya. (By James Oliver)
