Gipanawagan ni Jeany Rose Hayahay usa ka Indigenous Woman Human Rights Defender, ang pagtangtang sa value-added tax (VAT) ug pagpanubag sa kurapsyon isip kabahin sa mga isyung gipang singgit sa kababainhan atol sa usa ka protesta sa Davao City.
Matud ni Hayahay, bug-at sa mga kababainhan ang kasamtangang presyo sa mga palaliton ug buhis ilabina sa panahon nga nagpadayon ang inflation ug ubos gihapon ang minimum wage sa rehiyon.
Gipasabot niya nga ang VAT ug excise tax sa mga produktong petrolyo ug sa pipila ka pangunang pagkaon nagdugang sa palas-anon sa ordinaryong pamilya.
Gipasabot usab niya ang panawagan sa mga grupo sa kababainhan nga hunongon ang tanang porma sa violence against women and children, online man o pisikal.
Sumala pa sa human rights defender, nagpadayon ang pakigbisog sa kababainhan batok sa ekonomikanhong kalisod ug pang-abuso bisan pa sa dugay nang panawagan alang sa hustisya ug proteksyon. (by James Oliver)
