Prayoridad sa Simbahang Katolika ang pag-ampo nga mahupay na ang tensyon sa Middle East. Kini ang gibutyag ni Fr. Der John Faborada, ang kasamtangang hepe sa Archdiocesan Media Center sa Archdiocese of Cagayan de Oro.
Matud ni Faborada nga dili lang ang Pilipinas ang naapektuhan sa gubat apan ang ekonomiya sa tibook kalibutan.
Gawas niini, gipadayon usab sa kaparian ang ilang pag-ampo sa pagresolba sa flood control corruption scandal sa Department of Public Works and Highways (DPWH) nga hangtud karon wala pay kasulbaran, ug wala pa matumbok ang mga dagkung utok sa krimen.
Gi-awhag ni Faborada ang mga magbabalaod nga dili magpadala sa political patronage tungod kay hustisya ang gipangita sa katawhan nga maoy labing apektado sa depektosong proyketo sa kontrobersyal nga ahensya.
