Paslak na sa prisohan ang 25-anyos nga driver nga taga Gingoog City kinsa nakabangga sa usa ka motor nga adunay duha ka backride sa Barangay Pangpangon, Poblacion, Talisayan, Misamis Oriental niadtong Miyerkules Santo sa gabii.
Matod ni Talisayan MDRRMO Head Roenjen Buray, duha ang patay sa insidente ug usa pa ang kritikal human magsugat ang motor ug ang sakyanang Suzuki Jimny sa usa ka blind curve sa dalan.
Ang mga biktima giila nga sila si Jeason Lago ug ang SK Secretary sa Poblacion, Talisayan nga si Mary Grace Danuco, nga namatay diha-diha. Samtang ang usa ka backride, si Saldariada “Dardar/Darling” Winstanley, SK Chairwoman sa Barangay San Jose, kritikal nga gi-admit sa Northern Mindanao Medical Center (NMMC).
Hisayran nga grabe ang ka ngilngig ang insidente tungod kay pulos nabung-og ang ulo sa mga biktima nga nagsakay sa motor. Nadiskobrehan usab nga silang tulo walay suot nga helmet.
