Dili angay mabalaka ang mga employers kung mapatuman ang ₱1,200 nga usbaw sa pasweldo sa mga mamumuo tungod kay kini usa ka mutually beneficial nga solusyon o parehong makabenepisyo ang duha ka sektor, sumala ni Bong Solano Lazaro sa grupong No to Oil Price Hike Coalition.
Sa iyang interbyu sa Bombo Radyo, iyang giingon nga ang mga mamumuo dili lamang trabahante kondili konsyumer usab, ug kon motaas ang ilang kita, modako usab ang ilang kapasidad sa pagpalit sa mga produkto ug serbisyo sa mga negosyo.
Dugang pa niya, kon magpabilin nga ubos ang sweldo, posibleng maapektuhan ang negosyo tungod sa kakulang sa mopalit, nga mahimong mosangpot sa pagsira sa pipila ka establisemento.
Gipasabot usab niya nga kinahanglan adunay sakripisyo sa duha ka bahin, lakip na ang pagkunhod gamay sa profit margin sa mga negosyante aron ma-accommodate ang wage increase. Busa, iyang gipasidaan nga kon dili masulbad kini nga isyu, posibleng mosamot ang kahimtang sa ekonomiya ug mahimong moresulta pa sa mas grabeng krisis sama sa economic depression. (by James Oliver)
