GIPAMUGOS ni Philippine Coast Guard (PCG) Spokesperson sa West Philippine Sea (WPS) Rear Admiral Jay Tarriela nga ang pagpanalipod sa soberanya ug katungod sa Pilipinas sa WPS nakabase sa international law ug sa 2016 arbitral award.
Sa “The West Philippine Sea, Atin Ito! Cebu Caravan” sa UP Cebu, giingon ni Tarriela nga ang pagpanalipod sa teritoryo usa ka adbokasiya nga kinahanglan ang partisipasyon sa kabatan-onan.
Sayop, matod pa niya, ang hunahuna nga moatras ang Pilipinas tungod sa kahadlok nga naay masakripisyong kinabuhi, kay kini supak sa kaisog ug sakripisyo sa mga bayani.
Dugang pa, dili kinahanglan makig-gubat ang kasamtangang henerasyon apan angay panindigan ang gisakripisyo sa mga ninuno.
Ang pagkanta sa Pambansang Awit nagpahinumdom sa obligasyon sa matag-Pilipino nga panalipdan ang nasud bisan pa sa kalisdanan.
