Nagpahayag ang grupong Alliance of Concerned Teachers (ACT) Region-10 nga dili mabangkrupt ang nasud kung ipatuman sa gobyerno ang ilang sugyot nga pagtaas sa suholan sa mga magtutudlo.
Matod ni Roland Cruz, usa ka magtutudlo ug miyembro sa ACT, sa iyang interbyu sa Bombo Radyo, nga kung kaya sa gobyerno nga ipanghatag ang “male-maleta” nga kwarta alang sa personal nga interes, mas makaya usab niini ang paghatag og ₱50,000 entry-level salary sa mga teachers ug ₱36,000 alang sa mga non-teaching personnel.
Dugang pa ni Cruz, gamay ra kaayo ang ilang gihangyo kumpara sa mga gipangbulsa sa mga tiwaling opisyal.
Para kanila, angay ug dapat lang nga mahatagan og igong sweldo ang sektor sa edukasyon nga dugay nang nanawagan sa kabag-ohan ug nag-antos sa gamay nga suholan.
Nagpunto pa ang grupo nga ang makapabangkarote sa nasud mao ang pagpamulsa sa kwarta sa katawhan, dili ang paghatag og hustong sweldo sa mga sektor nga naglisod karong panahon sa krisis
